تحدثت الفنانة منى إش إش، عن تفاصيل علاقتها بطليقها الفنان ماجد المصري، مؤكدة أنهما حرصا على علاقة الصداقة بينهما من أجل مصلحة أبنائهما.

وقالت منى إش إش، في تصريحات تلفزيونية عن بداية تعارفها على الفنان ماجد المصري: بدأت أغني وأنا في أولى ثانوي وانا عندي 14 سنة، وبابا كان رافض وحاربني كتير إني أدخل الوسط الفني، وكنت في فرقة موسيقية في طنطا وماجد المصري قالي إيه رأيك نعمل دويتو أنا وانتي، وبدأنا ونجحنا جدًا وكنا بنقول إننا إخوات علشان المعجبين، وبعدين تزوجنا وخلفنا واتطلقنا الحمد لله.

كما كشفت منى إش إش، حقيقة إقدامها على الانتحار عقب انفصالها عن الفنان ماجد المصري، قائلة: لم أقدم على الانتحار بعد طلاقي من ماجد المصري، وأنا مقدرش اتكلم في الموضوع ده لأن الأطراف التانية بتزعل إني بتكلم على فترة من حياتي، وأنا كنت مع ماجد فترة كبيرة في عمري 15 سنة هو كان فيهم، واتجوزنا من 8 سنين وبعد كده زملاء عمل، وأنا لما بتكلم على ده دي ذكرياتي الخاصة وفي أولاد وشغل وذكريات كتير، ومينفعش إني ألغي الـ 15 سنة بتوعي علشان أي طرف تاني.

وتابعت منى إش إش: أنا بحب إخوات أولادي جدًا وبحبب أولادي فيهم من بدري، وطلعة ولادي بدفئ الأسرة أكننا منفصلناش، حتى لما انفصلنا كنا أصدقاء وماجد بيجي البيت عندنا وبيفطر معانا في رمضان، وبيعمل شغل مع بابا ومعظم ألحان ماجد الناجحة بابا اللي عملها له، خلاص إحنا في أولاد وعشرة وانفصلنا بالمعروف.

منى إش إش عن طليقها ماجد المصري: مرماش ولاده ورباهم معايا

وتحدثت الفنانة منى إش إش، عن الخلافات التي ظهرت للجمهور خلال الفترة الماضية، قائلة: المشاكل الأخيرة حصلت بسبب صحفي لا يمت لشرف المهنة بصلة، حب يجامل ماجد أوي في فرح ابني وجه على حقي، وكان لازم إني أخد وضعي وصوري تنزل لأني أم العريس، ولكن همشني وكان في تعتيم والموضوع كله راح للناحية التانية.

وأضافت: الناس كلها كانت بتسأل هي أم العريس فين، هي أم العريس ميتة؟ خاصة إني بعيد ومش عارفين اسمي أو شكلي أو اللي عارفني مش عارف إني بقيت ماما، فمينفعش علشان تجامل ماجد أنك تلغي وجودي، أنا كنت محافظة من ساعة من انفصلت إننا نكون كويسين علشان نبقى في ضهر بعض في أفراح أولادنا، وماجد الحمد لله مش زي الرجالة اللي بترمي ولادها وربى أولاده معايا، وربنا يخلي له أولاده ويخليه ليهم.